انـا ورب البيـت لـو يخذلونـك
مهما حصل لايمكن انـي اخليـك
اتـرك كـلام النـاس لايهمونـك
واسمع كلام اللي يعـزك ويغليـك
قد قلت لـك بالله فتـح عيونـك
اصحى قبل شمس الحقيقة تصحيك
راجع حساباتك بلحظـة سكوتـك
خذها نصيحة جعل ربـي يعافيـك
تفهمك ناس ونـاس مايفهمونـك
وتتبع لناس وناس تتبع خطاويك
نـاس تفكـر همهـم يسعدونـك
وناس تفكر كيـف تقـدر تبكيـك
لاتشتري من حاولوا يخسرونـك
ولاتخسر اللي فكر بيوم يشريـك
مافي اجمل من صديـق يصونـك
ولافي اقسى من قريـب يعاديـك
اكبر خطا نسيان مـن يذكرونـك
واعظم وفاء ذكر شخص متناسيك
اكبر عناد تخون شخص يخونـك
واجمل امل حـب جديـد يناديـك
اصعب سؤال اللي تجيبه ظنونـك
واكبر غباء انـك تغيـر مباديـك
واكبر قهر لاصار نـاس يبونـك
وانت تبيهم بس حظك لعب فيـك
اتعس حياة تعيش والحزن لونـك
لاصرت عم وصار حزنك بناخيـك
ان ورب البيـت لـو يخذلـونـك
مهما حصل لايمكن انـي اخليـك